Imana ntiyumva na busa amasengesho y’abateza intambara_Papa Léon XIV yamaganye abitwaza amasengesho mu gushimangira intambara
2 mins read

Imana ntiyumva na busa amasengesho y’abateza intambara_Papa Léon XIV yamaganye abitwaza amasengesho mu gushimangira intambara

Mu gihe intambara hagati ya Iran, Israel na Amerika ikomeje gufata indi ntera, Umushumba wa Kiliziya Gatolika ku Isi yasabye ko amasengesho atagomba gukoreshwa mu gushyigikira ubugizi bwa nabi.

Mu butumwa bukomeye yatanze kuri iki cyumweru 29 Werurwe 2026, Papa Léon XIV yatangaje ko Imana itemera na busa amasengesho y’abatangiza intambara, ashimangira ko Yezu Kristu ari Umwami w’Amahoro udashyigikira ubugizi bwa nabi.

Mu misa yayoboreye muri Bazilika yitiriwe Mutagatifu Petero mu Butaliyani, Papa Léon XIV yibukije ko ukwemera nyakuri kudakwiye kuvangwa n’intambara. Yavuze ko Imana itumva amasengesho y’abashyigikira ibikorwa byo kwica no gushoza imirwano, ashimangira ko ayo masengesho ahubwo yamaganwa.

Ati: “Ni Imana yacu, Yezu, Umwami w’Amahoro, ntiyemera na busa intambara ndetse nta we uyifashisha ngo ahe ishingiro intambara.”

Ibi yabivuze mu gihe isi ihangayikishijwe n’intambara imaze ukwezi ihanganishije Iran na Israel, aho Leta Zunze Ubumwe za Amerika zinjiye mu mirwano ziyishyigikira. Iyi ntambara imaze kugwamo abantu benshi, barimo n’abayobozi bakuru, ndetse abaturage basaga ibihumbi barakomeretse.

Papa Léon XIV yanenze byimazeyo bamwe mu bayobozi bifashisha amasengesho n’inyigisho z’ukwemera bashaka kugaragaza ko ibikorwa by’intambara bifite ishingiro. Yagaragaje ko Yezu Kristu atigeze yifashisha intwaro cyangwa ngo ashyigikire urugomo, ahubwo yigishije inzira y’amahoro n’imbabazi.

Ati: “Yezu ntiyigeze agendana intwaro cyangwa ngo yirinde cyangwa ngo arwane intambara n’imwe. Agaragaza ishusho y’Imana itemera intambara.”

Yifashishije amagambo yo muri Bibiliya, Papa yavuze ko Imana itumva amasengesho y’abafite ibiganza byuzuye amaraso, ashimangira ko gukoresha izina rya Yezu mu gusobanura intambara ari ukwica ubutumwa bwiza.

Yasabye abakirisitu n’abayobozi kwirinda gukoresha ukwemera mu nyungu za politiki n’intambara.

Yanagarutse ku bibazo bikomeye byugarije abakirisitu bo mu Burasirazuba bwo Hagati, cyane cyane mu gihe begereje kwizihiza Pasika mu bihe by’intambara. Yasabye impande ziri mu mirwano guhagarika ibikorwa by’ubwicanyi, zigahitamo inzira y’ibiganiro n’ubwiyunge kugira ngo amahoro arambye aboneke.

Leave a Reply

Your email address will not be published. Required fields are marked *