Twagira isi nziza ari uko dufite amahoro _Abafaransisikani bashyize imbere urubyiruko mu kubaka amahoro n’iterambere rirambye
3 mins read

Twagira isi nziza ari uko dufite amahoro _Abafaransisikani bashyize imbere urubyiruko mu kubaka amahoro n’iterambere rirambye

Urubyiruko rusaga 300 rwo muri Paruwasi enye rwahuriye i Kivumu mu ihuriro ryibanze ku mahoro, ubuvandimwe no kurengera ibidukikije, hagamijwe kururema ejo hazaza heza h’igihugu na Kiliziya.

Mu gihe isi n’akarere k’ibiyaga bigari bikomeje guhura n’ibibazo by’amakimbirane, iyangirika ry’ibidukikije n’ubushomeri bw’urubyiruko, umuryango w’Abafaransisikani watangije ihuriro ryihariye rigamije gushishikariza urubyiruko kuba inkingi y’amahoro, ubuvandimwe n’iterambere rirambye, unashimangira uruhare rwabo mu kubungabunga ibidukikije no kubaka sosiyete itekanye.

Kuva ku ya 26 kugeza ku ya 29 Ukuboza 2025, urubyiruko rusaga 300 rwaturutse muri Paruwasi enye zaragijwe Abafaransisikani rwahuriye mu Ihuriro ry’Urubyiruko rizwi nka Fransiscan Youth Forum on Peace, Fraternity and Ecology, ryabereye muri Centre Padiri Vjeko Tvt Schook i Kivumu, muri Diyosezi ya Kabgayi.

Iri huriro ryitabiriwe n’urubyiruko rwo muri Paruwasi ya Kivumu, ari na yo yari yakiriye iri gikorwa, Paruwasi ya Karama yo mu Arkidiyosezi ya Kigali, Paruwasi ya Mbazi yo muri Diyosezi ya Butare n’iya Nyarunyinya yo muri Diyosezi ya Gikongoro. Izi Paruwasi zose zihuriye ku butumwa bw’umuryango w’Abafaransisikani, bukurikiza urugero rwa Mutagatifu Faransisiko w’Asize.

Insanganyamatsiko y’iri huriro yagiraga iti: “Twagira isi nziza ari uko dufite amahoro”, mu Cyongereza A Safe Earth Grows a Peaceful World. Urubyiruko rwasabwe kuba ababibyi b’amahoro n’ubuvandimwe, no kugira uruhare rugaragara mu kurinda ibidukikije, bifatwa nk’umuvandimwe w’umuntu nk’uko byigishijwe na Mutagatifu Faransisiko.

Padiri Jean Eric Mutabazi, ushinzwe Komisiyo y’Ubutabera n’Amahoro mu muryango w’Abafaransisikani mu Rwanda no mu Burundi, wanayoboye itegurwa ry’iyi Forum, yavuze ko bishimiye intambwe yatewe, cyane ko ari ku nshuro ya mbere ihuriro nk’iri riteguwe ku rwego rw’igihugu.

Yagize ati “Twifuje guha urubyiruko inyigisho zibafasha kubaka umuco w’amahoro, kwita ku bidukikije no kwihangira imirimo. Umuntu udafite icyo akora byoroshye kumuyobya, ni yo mpamvu twateguye ibiganiro bibafasha kugira icyerekezo cyiza cy’ubuzima.”

Padiri Mutabazi yasobanuye ko bahisemo kwibanda ku rubyiruko kubera ko ari rwo rugaragaramo cyane ingaruka z’intambara n’amakimbirane, kandi ari na rwo rworoshye gushukwa. Yagaragaje ko kurutegura hakiri kare ari ugukumira ibishobora guhungabanya ejo hazaza h’igihugu na Kiliziya.

Mu gushyira mu bikorwa ubutumwa bwo kurengera ibidukikije, urubyiruko rwitabiriye iri huriro rwateye ibiti bisaga 600, hagamijwe kubungabunga ibidukikije no gutanga umusanzu mu guhangana n’ihindagurika ry’ikirere. Rwasabwe gukomeza kuba icyitegererezo cyiza mu baturage aho rutuye.

Padiri Mutabazi yananasabye urubyiruko gukoresha ikoranabuhanga n’imbuga nkoranyambaga mu kubaka amahoro aho kuyasenya, abibutsa ko amagambo arimo ubugizi bwa nabi ashobora guteza amakimbirane, cyane cyane mu rubyiruko.

Uretse inyigisho, iyi Forum yanabaye umwanya wo kugaragaza impano z’urubyiruko binyuze mu mivugo, indirimbo, imbyino n’ikinamico, hanabaho n’imikino irimo Volleyball na Basketball, byagize uruhare mu kurushaho kumenyana no kubaka ubumwe.

Habaye kandi umwanya wo kuzirikana mu isengesho, gushengerera Yezu mu Isakaramentu ry’Ukaristiya Ntagatifu no guhabwa Penetensiya, hagamijwe kwita ku buzima bwa roho n’ubw’umubiri, nk’ishingiro ry’umuntu wuzuye.

Mu gusoza iri huriro, buri Paruwasi yahawe umupira w’amaguru mu rwego rwo gukomeza ubumwe n’imikoranire. Urubyiruko rwasabye ko iyi Forum yaba ngarukamwaka, icyifuzo umuryango w’Abafaransisikani wemeye gushyira mu bikorwa.

Padiri Mutabazi yifurije urubyiruko umwaka mushya w’amahoro, w’uburumbuke n’ibidukikije bifite ubusugire, ashimangira ko umuryango w’Abafaransisikani uzakomeza kuba hafi y’urubyiruko mu kururemera ejo hazaza heza.

Leave a Reply

Your email address will not be published. Required fields are marked *