Pst Prince Mutabazi niwe uzayobora igitaramo Tumaini Praises Edition II”kizahuza amakorali atandukanye yo mw’Itorero ADEPR

Tumaini Choir yateguye igitaramo “Tumaini Praises Edition II” kizahuza amakorali akomeye mu RwandaTumaini Choir ikorera mw’Itorero rya ADEPR, Paruwasi ya Gisenyi, Umudugudu wa Bethel mu Karere ka Rubavu, irakataje mu bikorwa byo kuramya no guhimbaza Imana, ndetse no kugeza ubutumwa bwiza ku bantu binyuze mu muziki. Iyi korali igizwe ahanini n’urubyiruko, ikomeje kwagura ibikorwa byayo by’ivugabutumwa, ikaba iri mu makorali akomeje guteza imbere umuziki wa Gospel mu Ntara y’Iburengerazuba.

Mu rwego rwo gukomeza umurimo w’ivugabutumwa, Tumaini Choir yateguye igitaramo gikomeye cyiswe “Tumaini Praises Edition II”, kizabera mu Mujyi wa Gisenyi, kikazahuza abakunzi b’indirimbo zo kuramya no guhimbaza Imana. Iki gitaramo kije gikurikira ibikorwa bitandukanye iyi korali imaze igihe ikora, bigamije gufasha abantu kwegera Imana no gukomeza gukura mu buryo bw’umwuka. Tumaini Choir izaba iri kumwe n’amakorali n’amatsinda atandukanye arimo Shalom Choir ya ADEPR Nyarugenge, Bethel Choir, Bethania Choir, El-roi Worship Team, Les Messagers Choir, Urukundo Choir n’andi makorali. Kwitabira kw’aya makorali azwi mu muziki wa Gospel mu Rwanda, bitegerejweho kuzongera imbaraga mu kuramya no guhimbaza Imana.

Iki gitaramo kizabera kuri ADEPR Bethel Gisenyi, kikazamara iminsi myinshi. Ku wa Kane tariki ya 12 no ku wa Gatanu tariki ya 13, ibikorwa biteganyijwe kuva saa 4:30 kugeza saa 7:30 z’umugoroba. Ku wa Gatandatu tariki ya 14, igitaramo kizakomeza kuva saa 2:00 kugeza saa 7:00 z’umugoroba, mu gihe ku Cyumweru tariki ya 14, gahunda izaba kuva saa 1:00 kugeza saa 7:00 z’umugoroba, nk’uko bigaragara ku itangazo ry’igitaramo.

Mu bazaba bafite inshingano zitandukanye muri iki gikorwa harimo Pastor Nkwaya Amani uzaba ari umuyobozi w’igitaramo, Pastor Umimana Claude na Ev. Anicet Niyomugabo bazatanga ubutumwa bw’ijambo ry’Imana, mu gihe Pastor Mutabazi Prince na we azaba afite inshingano zo kuyobora igikorwa. Ibi byose bigaragaza ko igitaramo kizaba kirimo umuziki n’inyigisho zishingiye ku Ijambo ry’Imana.Tumaini Choir kandi ikomeje ibikorwa byayo byo gusohora indirimbo zifasha abakunzi bayo gukomeza kwizera Imana.

Mu Ukwakira 2026, iyi korali yashyize hanze amashusho y’indirimbo nshya yitwa “Urwo Rurembo”, irimo ubutumwa bwo guhumuriza no kwibutsa abantu amasezerano y’Imana. Indirimbo yakozwe mu buryo bw’amajwi na Producer Ishimwe, amashusho yayo afatwa na Director Thierry, umwe mu bakora amashusho y’indirimbo za Gospel mu Rwanda.

Shalom Choir n’andi makorali akomeye azitabira “Tumaini Praises Edition II”

“Urwo Rurembo” ikurikira izindi ndirimbo zagiye zikundwa n’abakunzi ba Tumaini Choir, zirimo “Hozana”, imaze imyaka hafi ibiri igira uruhare mu murimo w’ivugabutumwa w’iyi korali, ndetse na “Niyo Yabivunze”. Izi ndirimbo zigaragaza ko Tumaini Choir ikomeje gukoresha impano zayo mu kuramya Imana no kugeza ubutumwa bw’ihumure ku bantu batandukanye.Igitaramo “Tumaini Praises Edition II” ni indi ntambwe mu rugendo rw’ivugabutumwa rya Tumaini Choir, rikomeje guhuza urubyiruko n’abakunzi ba Gospel binyuze mu ndirimbo n’ibikorwa byo guhimbaza Imana. Mu gihe umuziki wa Gospel mu Rwanda ukomeje kwaguka, ibikorwa nk’ibi bifasha amakorali gukomeza gukorana no kugeza ubutumwa bwiza ku bantu benshi.