Abakoresha Gmail bibwe amakuru na ba rushimusi bayifashisha mu nyungu zabo
1 min read

Abakoresha Gmail bibwe amakuru na ba rushimusi bayifashisha mu nyungu zabo

Muri Kamena 2025, sosiyete ya Google yarinjiriwe, bitera impungenge ku mutekano wa konti za Gmail zisaga miliyoni 2,5.

Itsinda rya ba rushimusi bo ku ikoranabuhanga ryitwa ShinyHunters ryabigezeho nyuma yo kwinjira mu bubiko bw’amakuru bwa Google, nyuma yo kubeshya umukozi w’iyi sosiyete agatanga amakuru ye [login details].

Google yemeje ko iki kibazo cyabaye muri Kanama 2025.

Nubwo bivugwa ko nta magambobanga yibwe, ba rushimusi babashije kubona inyandiko zigaragaza amazina y’ibigo bimwe bikoresha Gmail ndetse n’amakuru amwe n’amwe y’abantu ku giti cyabo.

Ubu barimo gukoresha ayo makuru mu guhamagara abantu no kubohereza ubutumwa, biyitirira abakozi ba Google babeshya bashaka kubagusha mu mutego wo gutanga amakuru yabo y’ibanga cyangwa kwinjira muri konti zabo.

Hari abahamagawe na nimero ifite code ya 650 basabwa guhindura amagambo y’ibanga ya Gmail yazo. Aba barushimusi bashobora no kugerageza amagambo banga akunda gukoreshwa nka “password”, kugira ngo binjire muri konti ziyakoresha.

Abahanga mu by’umutekano w’ikoranabuhanga basabye abantu bafite Gmail gukora ibintu bitandukanye mu rwego rwo gukaza umutekano wa konti zabo.

Bimwe mu byo basabwe ni ukwemeza uburyo bwo kugenzura uburyo bw’ubwirinzi bukoresha intambwe nyinshi [multi-factor authentication] mu gihe umuntu utabifitiye ubushaka ashaka kwinjira muri konti yawe.

Hari kandi gukoresha amagambobanga akomeye kandi adasanzwe, no gukora igenzura ry’umutekano wa konti yawe ya Google [Google security checkup] kugira ngo umenye ahashobora kumenerwa ukinjirirwa.

Google yagaragaje kandi ko hakwiye kubaho ukwitonda mu gufungura no gusubiza ubutumwa bwa e-mail cyane ubuteye amakenga, kwirinda abahamagara bayiyitiriye no kudasangizanya ijambobanga n’abantu benshi.

Leave a Reply

Your email address will not be published. Required fields are marked *