“Oya, nta dini ngira. Buri wese ntakwiriye kugira idini.”_Hon Tito Rutaremara
Mu kiganiro cyihariye yagiranye n’Ikinyamakuru KP Media24 kuri YouTube, Tito Rutaremara yatangaje ko adashingiye ku idini runaka kandi ko atemera Imana ku buryo busanzwe abantu bayemeramo.
Nka Gospel Today News, tugendeye uko inyandiko nyinshi z’iyobokamana n’amasomo ku myemerere y’abantu nka Durkheim, The Elementary Forms of Religious Life zibigaragaza, abantu basenga kubera impamvu nyinshi zitandukanye zishingiye ku myemerere, ku muco, ku byiyumvo byabo, ndetse no ku bushake bwo gushaka ihumure mu buzima.
Bamwe basenga kugira ngo bashimire cyangwa basabe imbaraga z’Imana cyangwa izindi mana, abandi bakabona isengesho nk’uburyo bwo kuganira n’Ikiruta byose, gushaka ihumure mu bihe bikomeye, cyangwa kugaragaza ubwubahane n’urukundo ku byo bemera.
Hari n’abasenga nk’umuco cyangwa gakondo, aho isengesho riba riri mu mibereho yabo ya buri munsi, rigatuma bumva bafite umurongo uhamye mu buzima, bagakomeza guhuza umutima n’abandi mu muryango cyangwa mu itorero, ndetse no kugirira abandi neza.
Ikindi, abantu basenga kubera ukwiyumvamo icyizere n’icyerekezo cyiza, kuko amasengesho ashobora gutanga icyizere, gutuza mu mutima, no gutuma umuntu agira imbaraga zo guhangana n’ibibazo by’ubuzima bwa buri munsi.
Imana bayifata nk’inshuti bakwiriye gusenga bayibwira uko biyumva, ibyo bateganya, kandi bakemera ko kuyisenga byongera ubucuti hagati yabo na Yo, bakaba bari no gushaka itike izabinjiza mu buzima buhoraho bwa nyuma y’urupfu.
Ibyo ariko si ko Tito Rutaremara abibona, mu gusubiza ku kibazo cy’umunyamakuru ku birebana n’imyemerere ye, Tito yahakanye ibyo kugira idini iryo ari ryo ryose abarizwamo, kuko ngo abona nta mpamvu yamutera kurigira, ndetse ahamya ko atajya yemera ibyo abantu bakora basenga Imana, uretse ko ababikora atabatera amabuye, kuko ari uburenganzira bwabo.
Yagize ati: “Oya, nta dini ngira. Buri wese ntakwiriye kugira idini.” Umunyamakuru yamubajije niba yemera Imana y’i Rwanda, Tito amusubiza ko atayemera, ashingiye ku kuba nta dini afite.
Yongeyeho ati: “Imana y’i Rwanda isengwa na Rutangarwamaboko gusa, abandi ntibakiyisenga. Izindi mana zirimo iya Isiraheli, iz’Abayisilamu, iza he n’iza he, izo si iz’iwacu.”
Tito yakomeje asobanura impamvu atajya asenga, anavuga icyo atekereza kuri iyo Mana abandi basenga, ati: “Nsenga iki se kandi? Imana nayibaza iki? Ujya kuvuka se wasenze ubisaba ngo bibeho?
Yo yabonye ubikwiriye irabiguha. Abakristo bavuga ko Imana igira urukundo, izi ibintu byose, ifite ubushobozi buhanitse cyane. Niba rero izi byose ubwo bivuze ko iyo ugiye gusenga uba uri guta igihe, kuko iba izi icyo ugiye gusaba.”
Uretse imyemerere ye, Tito yasobanuye n’uburyo yitwara ku bantu bemera Imana, ati: “Ndabubaha. Uwemera Imana ndamwubaha rwose, ndabimwubahira kuko biba bimushimishije.
Yanambwira ngo ngwino umperekeze tujyane gusenga nkajyayo, ibyo akoze nkabimwubahira ndetse nanjye nkabikora, yaba Umuyisilamu, Umuporoso, Umunyagatulika, bose ndabubaha, ni uburenganzira bwabo, na bo bampa ubwange.”
Tito Rutaremara, wavukiye mu karere ka Gatsibo, Umurenge wa Kiziguro mu 1944, ni umwe mu banyapolitiki b’inzobere mu Rwanda, ufite impamyabumenyi zisumbuye (License, Maîtrise, ndetse na Doctorat), akaba yarize mu Bufaransa.
