Muri Champions League ikipe ya Arsenal yihanije ikipe ya Bayern Munich: Haribazwa uzahagarika iyi kipe?
Arsenal yatsinze Bayern Munich ibitego 3-1 mu mikino w’Umunsi wa Gatanu wa UEFA Champions League wabaye mu ijoro ryo ku wa Gatatu, tariki ya 26 Ugushyingo 2025 kuri Emirates Stadium.
Uyu mukino wari utegerejwe cyane watangiye wihuta amakipe yombi asatirana agerageza uburyo bw’ibitego.
Ku munota wa 22, Arsenal yafunguye amazamu ku gitego cyatsinzwe na Julian Timber n’umutwe, ku mupira wari uvuye muri koruneri yatewe neza na Bukayo Saka.

Bayern Munich ntiyacitse intege kuko yakomeje gusatira. Joshua Kimmich yateye umupira muremure usaga Serge Gnabry awuhindura imbere y’izamu usanga Lennart Karl yishyura igitego ku munota wa 32.

Igice cya mbere cyarangiye amakipe yombi anganya igitego 1-1.
The Gunners yatangiranye igice cya kabiri imbaraga nyinshi isatira bikomeye ariko uburyo bw’ibitego bwabonwaga na Mikel Merino na Bukayo Saka ntibubyare umusaruro.
Ku munota wa 61, Declan Rice yazamukanye umupira wenyine yihuta asigarana n’umunyezamu Manuel Neuer awuteye awukuzamo akuguru.
Riccardo Calafiori yazamukanye umupira ku ruhande rw’ibumoso, awuhindura imbere y’izamu Noni Madueke atsinda igitego cya kabiri ku munota wa 69.

Bidatinze, Arsenal yakinaga neza cyane Gabriel Martinel yacomekewe umupira mwiza mu kibuga hagati umunyezamu Neuer asohoka nabi aramucenga, uyu Munya-Bresil azamuka yihuta atsinda igitego cya gatatu ku munota wa 77.

Iyi kipe yo mu Budage yagerageje gusatira ishaka uko yishyura ibitego ariko biranga. Umukino warangiye Arsenal yatsinze Bayern Munich ibitego 3-1.
Indi mikino yabaye, Liverpool ikomeje kuba mu bihe bibi cyane yatsindiwe mu rugo na PSV Eindhoven ibitego 4-1

Real Madrid itsinda Olympiacos ibitego 4-3 birimo bitatu bya Kylian Mbappé yatsinze mu minota irindwi.

Mu mukino w’injyanamuntu, Paris Saint Germain yatsinze Tottenham ibitego 5-3, Atletico Madrid itsinda Inter de Milan ibitego 2-1, mu gihe Atalanta yatsinze Frankfurt ibitego 3-0.

Sporting Lisbon yatsinze Club Brugge ibitego 3-0, AS Monaco inganya na Pafos ibitego 2-2, mu gihe Copenhagen yatsinze Kairat ibitego 3-2.
Umunsi wa Gatanu wa UEFA Champions League wasize Arsenal itaratsindwa iri ku mwanya wa mbere n’amanota 15 ikurikiwe na PSG, Bayern Munich, Inter de Milan na Real Madrid zifite 12.
Borussia Dortmund ya gatandatu, Chelsea, Sporting, Manchester City na Atalanta zifite amanota 10. Ni mu gihe Liverpool iri ku mwanya wa 13 n’amanota icyenda, FC Barcelone ni iya 18 n’amanota arindwi.
Umunsi wa gatandatu uzakinwa tariki ya 9 n’iya 10 Ukuboza 2025 ahateganyijwe umukino ukomeye wa Real Madrid na Manchester City.
