Papa Leo XIV Yahamagariye Abakristo Guhurira i Yeruzalemu mu 2033
3 mins read

Papa Leo XIV Yahamagariye Abakristo Guhurira i Yeruzalemu mu 2033

Nyuma y’imyaka 1,700 y’Inama ya Nisea, Umushumba wa Kiliziya Gatolika asaba amatorero yose kugaruka ku nkomoko y’ukwemera, bakitegurira hamwe Yubile y’Agakiza ya 2033. Ubutumwa bw’Ubumwe, Amahoro n’Ukwiyunga

Mu butumwa bwuje ukwicisha bugufi n’icyifuzo cy’ubumwe, Papa Leo XIV yongeye gusaba Abakristu bo mu madini atandukanye gukora urugendo ruhuriweho, bagasubira mu Mujyi wa Yeruzalemu mu rwego rwo kwitegura Yubile y’Agakiza izizihizwa mu 2033, ubwo hazaba hashize imyaka ibihumbi bibiri Yezu apfuye, akazuka ndetse akazamuka mu ijuru akaba yicaye iburyo bw’Imana data.

Ibi Papa yabigarutseho nyuma y’uko ku wa gatanu, mu Mujyi wa Iznik muri Turukiya (ahahoze hitwa Nisea), abayobozi b’amatorero menshi ya gikristo basangiye isengesho ku butumire bwa Patriarike wa Konstantinopoli, Bartholomew, mu kwizihiza imyaka 1,700 ishize habaye Inama Nkuru ya mbere y’Abakiristu. Ni umuhango mugufi ariko wuzuye amarangamutima, wabereye hafi y’ahagaragaye ibisigazwa bya Basilika ya Mutagatifu Neophytos byongeye kugaragara hejuru y’amazi.

Nubwo uwo mwanya w’ubusabane wahuje Abagatolika, Abayorthodoxe n’Abaprotestanti, abitabiriye bagaragaje agahinda k’abatarashoboye kwitabira. Ni yo mpamvu, mu masaha make yakurikiyeho, Papa Leo XIV yongeye guhura n’abayobozi bari bitabiriye Iznik, arabashimira kandi yifuza ko hazabaho izindi nama n’ibihe nk’ibyo, harimo no guhurira hamwe n’amatorero atarabashije kuboneka.

Vatican News, yatangaje ko Umushumba wa Roma yasabye ko Yubile ya 2033 yaba umwanya wo kwizihiriza hamwe Agakiza no gusubira aho byose byatangiriye: i Yeruzalemu. Ni ubutumire buhamagarira Abakristo “kurenga Nisea” bakagaruka ku ntangiriro z’ukwemera kwabo.

Papa Leo yabukomojeho yibutsa ko umurimo wo kwamamaza Ivanjili no gutangaza ubutumwa bw’ibanze bw’ukwemera ari bwo shingiro rya Kiliziya, kandi ko amacakubiri akiri hagati y’Abakristu akomeza kuba inzitizi ku buhamya bwabo.

Kugaruka i Yeruzalemu bisobanuye gusubira kuri Golugota, aho Umukiza yapfiriye; bisobanuye gusubira ku mva ababyeyi b’abagore basanze irimo ubusa mu gitondo cyo Pasika. Ni ukugaruka mu Cyumba cyo Hejuru aho Yesu yahanze itegeko rishya, akoza intumwa ibirenge, bagasangira umugati; ni n’ukugaruka ku munsi wa Pentekositi ubwo itsinda rito ry’abantu bahungabanye ryahindutse intumwa zitagira ubwoba, ziteguye gutanga ubuzima bwazo kubera guhamya ko Yezu wazutse ari Umwana w’Imana.

Aho ni naho abigishwa bahuriye na Nyagasani wazutse, babona ko ari muzima kandi ari kumwe nabo. Mu Cyumba cyo Hejuru ni ho bakiriye Roho Mutagatifu, ubahindura abamisiyoneri batigeze bacika intege.

Papa Leo avuga ko gusubira i Yeruzalemu ari uguhinduka abagenzi, tugahurira hamwe nk’abavandimwe, tukibuka icy’ingenzi kurusha ibindi: gukuraho ibidafite umumaro nk’amatiku ya politiki, ya gisirakare, ya Kiliziya, ubwikunde, ubwikanyize, amoko, intwaro z’inyungu, n’imigenzo y’abantu yadutwaye kure y’umutima w’Ivanjili.

Ni ugutsinda amacakubiri binyuze mu gusubirana ihame ry’ibanze ry’ubutumwa bwiza, ibyo Kiliziya ikeneye kandi isi yose ikeneye.

Mu maso ya Patriarike wa Konstantinopoli, Papa Leo XIV yagize ati: “Ni nde utabona ko dukeneye amahoro, ubumwe n’ubwiyunge muri twe, hagati yacu no mu isi?”

Ubutumire bwo guhurira i Yeruzalemu mu 2033 ni ubutumire bwo guhura twicishije bugufi, nk’abavandimwe, kugira ngo turangurure amagambo y’Umutabyi w’i Galileya: “Uri Kristu, Umwana w’Imana Nzima!”

Leave a Reply

Your email address will not be published. Required fields are marked *