SECAM n’Umuryango w’Ubumwe bwa Afurika bagiye gusinyana amasezerano mashya agamije guteza imbere amahoro n’iterambere muri Afurika
Ku wa 13 Gashyantare 2026 hazasinywa amasezerano azasinyirwa i Addis Ababa ku wa 13, agamije gushimangira ubufatanye mu kurengera uburenganzira bwa muntu, kubaka amahoro no guteza imbere imiyoborere myiza ku mugabane wa Afurika.
Mu rwego rwo gukomeza umurage wa Kiliziya Gatolika wo guharanira amahoro, ubutabera n’icyubahiro cya muntu, Ihuriro ry’Inama z’Abepiskopi Gatolika muri Afurika no muri Madagascar na Komisiyo y’Umuryango w’Ubumwe bw’Afurika bagiye gushyira umukono ku masezerano mashya y’ubufatanye agamije guteza imbere amahoro n’iterambere rirambye ku mugabane wa Afurika.
Aya masezerano ateganyijwe gusinyirwa ku cyicaro gikuru cya Komisiyo y’Umuryango w’Ubumwe bw’Afurika kiri i Addis Ababa muri Ethiopia ku wa 13 Gashyantare 2026.
Amasezerano azashyirwaho umukono ku ruhande rwa SECAM na Nyiricyubahiro Fridolin Karidinali Ambongo Besungu, Perezida w’iri huriro akaba n’Arikiyepisikopi wa Kinshasa muri Repubulika Iharanira Demokarasi ya Congo. Mu gihe ku ruhande rw’Umuryango w’Ubumwe bw’Afurika, azashyirwaho umukono na Ambasaderi Bankole Adeoye, Komiseri ushinzwe Politiki, Amahoro n’Umutekano muri Komisiyo y’uyu muryango.
Aya masezerano mashya aje gusimbura ayari yarashyizweho umukono mu mwaka wa 2015, hagamijwe kuvugurura no kunoza imikoranire ishingiye ku miterere mishya y’inzego z’Umuryango w’Ubumwe bw’Afurika.
Mu ntego z’ingenzi z’aya masezerano harimo gushimangira ibikorwa byo kurengera uburenganzira bwa muntu n’ubw’abaturage, guteza imbere imiyoborere myiza, demokarasi n’iyubahirizwa ry’amategeko. Harimo kandi gushyigikira gahunda zo kubaka amahoro, kwimakaza ubwiyunge n’ubumwe mu bihugu bya Afurika, hagamijwe gushimangira ituze n’umutekano birambye.
Aya masezerano ateganya kandi ubufatanye mu guhangana n’ibibazo by’ubutabazi bwihuse, kurengera impunzi n’abandi bantu bari mu kaga, no kurushaho kwita ku bidukikije no guhangana n’imihindagurikire y’ikirere binyuze mu micungire irambye y’umutungo kamere.
Ibi byose bigamije guteza imbere imibereho myiza ya muntu no gushyigikira Icyerekezo cya Afurika 2063 kigamije umugabane uteye imbere, utekanye kandi uharanira iterambere rishingiye ku baturage bawo.
Gushyira umukono kuri aya masezerano bifite akamaro kihariye, kuko bibaye mu gihe SECAM na AU bari basanzwe bafatanya mu gutegura inama yihariye ku kurengera umutungo w’amazi n’isuku yabereye i Addis Ababa ku wa 7 Gashyantare 2026.
Azanasinywa kandi mbere gato y’Inama ya 39 ihuza Abakuru b’Ibihugu na za Guverinoma zigize Umuryango w’Ubumwe bw’Afurika, iteganyijwe ku wa 14 na 15 Gashyantare 2026.
Ubu bufatanye bugaragaza uruhare Kiliziya Gatolika ikomeje kugira mu gushyigikira gahunda z’iterambere rya Afurika, bugaragaza kandi ko gukorera hamwe hagati y’imiryango mpuzamahanga, za guverinoma n’inzego zishingiye ku myemerere ari ingenzi mu guteza imbere ubutabera, amahoro n’iterambere rya muntu ku mugabane wa Afurika.
