Papa Léon XIV mu rugendo rwa mbere muri Afurika ruzamara iminsi 10
1 min read

Papa Léon XIV mu rugendo rwa mbere muri Afurika ruzamara iminsi 10

Mu rugendo rwe rwa mbere muri Afurika, Papa Leon XIV azasura Algeria, Angola, Guinée Equatoriale na Cameroun hagati ya 13 na 23 Mata 2026 mu rwego rwo gushimangira ukwemera, amahoro n’ibiganiro hagati y’amadini. Ni mu gihe uyu mugabane  abayoboke ba Kiliziya bakomeje kwiyongera.

Umushumba wa Kiliziya Gatolika ku Isi, Pope Leo XIV, arateganya kugirira urugendo muri Afurika kuva ku wa 13 kugeza ku wa 23 Mata 2026. Ni bwo bwa mbere agiye gusura uyu mugabane kuva yatorwa. Uru ruzaba ari urugendo rwe rwa mbere Mpuzamahanga mu 2026 nk’uko byatangajwe na Vatican ku wa 25 Gashyantare 2026.

Muri uru rugendo, azasura ibihugu bine ari byo Algeria, Angola, Equatorial Guinea na Cameroon. Biteganyijwe ko azakirwa n’abakirisitu benshi ndetse n’abayobozi b’ibihugu, hagamijwe gushimangira iterambere, amahoro n’ibiganiro bihuza abakirisitu Gatolika n’abayoboke b’Idini ya Islam cyane cyane muri Algeria.

Papa Léon XIV yatowe muri Gicurasi 2025 asimbuye Pope Francis witabye Imana muri Mata uwo mwaka. Kuva yatangira inshingano ze, amaze gukora urugendo rumwe Mpuzamahanga aho yasuye Turikiya na Liban mu mpera za 2025, agaragaza ko ashishikajwe no gukomeza ubutumwa bw’amahoro n’ubwiyunge.

Urugendo rwe muri Afurika rukurikiye izindi ngendo z’abamubanjirije, zirimo urwa Papa Francis wasuye Repubulika Iharanira Demokarasi ya Congo na Sudani y’Epfo mu 2023, ndetse na Pope Benedict XVI wasuye Angola na Cameroun mu 2009. Ni bwo bwa mbere Umushumba wa Kiliziya Gatolika azaba asuye Algeria, igihugu cyiganjemo abayoboke b’Idini ya Islam.

Imibare ya Vatican igaragaza ko 20 ku ijana by’abakirisitu Gatolika ku Isi babarizwa muri Afurika, bigaragaza ko uyu mugabane ufite uruhare rukomeye mu buzima bwa Kiliziya.

Uretse uru rugendo, Papa Léon XIV ateganya gusura Monaco muri Werurwe 2026, Espagne muri Kamena 2026 ndetse na Peru mu Ugushyingo 2026, aho yakoreye umurimo w’Imana igihe kirekire.

Leave a Reply

Your email address will not be published. Required fields are marked *